ازاى تدي حبيبتك استمارة 6

ازاى تقلب حبيبتك..
خلاص بح..
بدأت تحس بأن الفيلم جاب اخره..
وأن العلاقة بينك وبينها بقت فاترة لا سخنة ولا باردة..
زي المية لا ليها لون ولا طعم..
من الآخر جبت اخرك..
دول خمس طرق مودرن للخلع من حبيبتك..
بالذوق أو بالعافية..
مش فارقة معانا!

• خد نفس طويل وابدأ في كتابة إيميل غرامي من النوع الجامد جدا ..
واشرح لحبيبتك ازاى انت مش عارف تعيش من غيرها ثانية واحدة ..
وأنك بتفـــكر فيها طــول الليل والنهار ..
وأنها -على رأي اللمبي- "الحب الحب.. الشوق الشوق
" بس متنساش تبدأ الايميل بـ"حبيبتي مروة"
وتكتب ف اخره بـ" بحبك يا مروة"..
و طبعا حبيبتك اسمها "ليلى"..
وهو المطلوب إثباته!

• اكتشف فجأة أن لك جذورا صعيدية !!
و روح لحبيبتك وأنت ترتدي الجلباب الصعيدي وتحمل كفنك علي يدك..
قبل ما تفوق هي من صدمتها قول لها الحقيقة..
"امبارح بس اكتشفت إن جدي السابع كان من الصعيد..
وإن عليه تار بايت مع عيلة الدهاشنة"..
"والحل الوحيد عشان ماياخدوش بتارهم مني ومايقتلونيش..
إني أتجوز بنت عم جدي.."
ودموعها تنهمر استمر في الضغط ..
"طبعا أنا رفضت أضحي بحبك ليا..
وقلت لهم أموت ولا أسيبك يا ليلى..
وعشان كده جبت معايا كفني وهاطلع من هنا عليهم على طول..
أموت ولا أضحي بحبك.."
النتيجة مضمونة..
ليلى بنفسها هي التي ستقدم لك شبكة خطوبتك على بنت عم جدك.. الصعيدي !

• وأنت قاعد في الكافيه مع حبيبتك وتنظر بعينين ساهمتين إلى منظر غروب الشمس في النيل..
قل لها.. "ليلى.. أنا عاوز أقول لك على حاجة"..
ستنظر لك بعيون قلقة..
استمر في التسهيم في الغروب وأنت تقول لها ..
"كان بقالي فترة حاسس إني تعبان قوي.. وصحتى مفستكة..
ومش قادر أقف على رجلي..
فرحت للدكتور اللي خوفني أكتر وطلب مني تحاليل وطلعت النتيجة..
"فترة صمت طويلة ضرورية للتأثير الدارمي !!!
ويا سلام لو كان في الخلفية موسيقى تصويرية ثم ألقِ بالقنبلة..
"أنا عندي..
عندي..
..........
ومش هاعيش إلا شهور قليلة..
وماقدرش أظلمك معايا أكتر من كده"
ثم انهض فجأة من مكانك واترك المكان كله ودعها وهي تبتلع الصدمة..
وتدفع حساب العصير أيضا !

• اتصل بحبيبتك وقل لها إنك تريد أن تقابلها لأمر مهم جدا..
اصنع كل علامات القلق والحيرة على وجهك ..
ثم قل لها بأن خالك الموجود في البرازيل منذ أكثر من 30 سنة أرسل إليك عقد عمل في مزارع البن هناك ..
وأنها فرصة لا يمكن أن تعوض ..
وأن حال البلد هنا لا يسر عدواً ولاحبيبا ..
وأن فرصة أن تعمل هنا في هذا المنصب الخطير ..
"عامل في مزرعة بن" معدومة لأننا في مصر لا نزرع البن أصلا!..
ولأنك شهم وابن بلد فإنك ستقول لها
"ليلى.. أنا مش ممكن أعذبك معايا أكتر من كده..
ومش عارف هارجع من البرازيل إمتى ولا أصلا جايز مارجعش..
البن كان أقوى مما بينّا.. الوداع.. الوداع يا ليلى"!..
ولا تنسَ أن ترسل لها بعد كام شهر كيلة من البن البرازيلي "المحوج"
الذي يبيعه عم "طه" على أول شارعكم..
حتى تتأكد من أنك هناك فعلا!

إذا قمت بكل هذه المحاولات مع "ليلى"..

بعت لها إيميل غلط...
واتجوزت بنت عم جدك السابع ذات الجذور الصعيدية..
وعييت .. وسافرت البرازيل حتى تخلع..
ورغم كل هذا ظلت متعلقة بك.. لا يوجد حل شيك آخر..


قل لها وأنت تنظر في عينيها
"بت.. أنا مش طايقك ومش عاوز أشوف وشك تاني!"..
إذا استمرت في حبها لك..
اتجوزها و اخلص